Pounamu Pounamu - Te reo Maori edition

Author: Witi Ihimaera

E rima tekau tau ki muri, ka puta mai a 'Pounamu Pounamu' hei kai ma te ao panui reo Pakeha. Ko te whakataunga o nga mana matauranga o Aotearoa o taua wa, he pukapuka tēnei ma nga tamariki kura o te motu whanui. Kua huri te ao, kua hipa te wa, ko tēnei a 'Pounamu Pounamu' e horahia nei hei hakari ma te tamaiti reo Maori, ko ia ra te mokopuna a te kaipanui reo Pakeha o mua. Ka pēhea te kawe i te wairua o tēnei kohinga korero e rangiwhawha nei te panuitia, kia rangona tonutia te kounga o te kupu Pakeha? Me kawe tonu i te pukuhohe o He Kēmu Kari, i te ngau mamae o Tangi, i te hohonu o te aroha o Te Tamaiti. Kua whakautua taua karanga e nga kaiwhakawhiti reo Maori tekau, no nga hau e wha, no nga waka e whitu. Ko ta te kahui homiromiro hoki, he whakahangai i nga whakamaoritanga ki te reo o te kaituhi ake, kia rongohia ai te kakara o tona mita e rere ana i nga wharangi o te pukapuka. Kei roto nei nga hua o ta ratou whakaheke tota, o ta ratou ketuketu i te kupu - kia mot juste. Kai te tū rangatira tonu nga kupu i rere mai ai i te pene a Witi Ihimaera, nana te huarahi i para ma te kaituhi kaupapa Maori. Me mihi, ka tika. Ko Kotahi Rau Pukapuka te waka. Ko te pae tawhiti, kia 100 nga pukapuka reo Maori ka pae ki uta. Ko te whainga kia puawai te aroha ki te reo ma te rau pukapuka. Tēnei matou e pohiri ana i a Penguin Random House hei hoa whakatere, hei hoa whakatutuki i nga wawata o te hunga e ngakaunui ana ki te reo Maori.